Þórdís Kolbrún Reykfjörð Gylfadóttir, ferðamála-, iðnaðar og nýsköpunarráðherra, heimsótti Austur-Húnavatnssýslu síðastliðinn mánudag ásamt aðstoðarmanni sínum, Ólafi Teiti Guðnasyni. Heimsóknin var í boði sameiningarnefndar sveitarfélaganna í sýslunni og var tilgangur hennar að kynna nýsköpun og atvinnuþróun á svæðinu, sem og þau tækifæri og áskoranir sem íbúar svæðisins standa frammi fyrir.

Í upphafi ferðar fékk ráðherra kynningu á uppbyggingu ferðamannastaðar á Þrístöpum, þar sem síðasta aftaka á Íslandi fór fram. Þá var farið var í sveitaverslunina að Hólabaki, þar sem eigendur kynntu starfsemina og framleiðsluna. Á Húnavöllum fékk ráðherra kynningu á möguleikum á aukinni orkuvinnslu á svæðinu á vegum Landsvirkjunar og áformum um eflingu flutningsnetsins. Því næst var gagnaver Etix á Blönduósi skoðað og þaðan farið í Textílmiðstöð Íslands á Blönduósi þar sem stjórnendur kynntu þau metnaðarfullu verkefni sem Textílmiðstöðin er þátttakandi í.

Á Skagaströnd skoðaði ráðherra rannsóknaraðstöðu Biopol og Vörusmiðju fyrirtækisins, þar sem framleiðendur buðu upp á sýnishorn af matvælaframleiðslu sinni, sem gerður var afar góður rómur að. Ráðherra fékk jafnframt kynningu á uppbyggingu á aðstöðu fyrir ferðamenn í Kálfshamarsvík og á hugmyndum um uppbyggingu baðstaðar á Skagaströnd.

Matvælaframleiðsla, ferðaþjónusta og textiliðnaður er meðal helstu vaxtarsprota svæðisins og vinna sveitarfélögin sameiginlega að fjölgun atvinnutækifæra í sýslunni. Sameiginleg sýn og skýrar aðgerðir sveitarfélaga, ríkisvalds og aðila vinnumarkaðar eru forsendur þess að vel takist til.

Sá stuðningur sem Þórdís Kolbrún sýnir með heimsókninni er mikils virði og kann sameiningarnefndin henni bestu þakkir fyrir.