Sameining Austur-Húnavatnssýslu

Eldri fréttir

 Frá:   Til: 
Orðaleit:
 Birta   línur
  1-20 af 20  
KlukkanDagsetningFrétt
15:51 14. okt. 2020  

Skipa fulltrúa í samstarfsnefnd

Sveitarstjórnir Blönduósbæjar og Skagastrandar hafa samþykkt tillögu sameiningarnefndar Austur-Húnavatnssýslu um að sveitarfélögin fjögur í sýslunni hefji formlegar sameiningarviðræður og skipi tvo fulltrúa hvert sveitarfélag og tvo til vara í samstarfsnefnd. Skagaströnd hefur skipað Halldór G. Ólafsson og Kristínu B. Leifsdóttir í samstarfsnefndina og Péturínu L. Jakobsdóttur og Guðmund Egil Erlendsson til vara. Blönduósbær hefur skipað Guðmund Hauk Jakobsson og Birnu Ágústsdóttur og til vara Sigurgeir Þór Jónasson og Gunnar Tryggva Halldórsson.
09:29 04. okt. 2020  

Lagt til að formlegar sameiningarviðræður sveitarfélaga í A-Hún. hefjist

Sameiningarnefnd sveitarfélaganna í Austur-Húnavatnssýslu hefur samþykkt að leggja til við sveitarstjórnir Blönduósbæjar, Húnavatnshrepps, Skagabyggðar og Sveitarfélagsins Skagastrandar að hafnar verði formlegar sameiningarviðræður. Lagt er til að sveitarfélögin samþykki að skipa tvo fulltrúa hvert sveitarfélag og tvo til vara í samstarfsnefnd sem kanna skal möguleika á sameiningu sveitarfélaganna í samræmi við 119. grein sveitarstjórnarlaga.
21:50 20. sep. 2020  

Ferðamála-, iðnaðar og nýsköpunarráðherra í heimsókn í Austur-Húnavatnssýslu

Frá sameiningarnefndinni

Þórdís Kolbrún Reykfjörð Gylfadóttir, ferðamála-, iðnaðar og nýsköpunarráðherra, heimsótti Austur-Húnavatnssýslu síðastliðinn mánudag ásamt aðstoðarmanni sínum, Ólafi Teiti Guðnasyni. Heimsóknin var í boði sameiningarnefndar sveitarfélaganna í sýslunni og var tilgangur hennar að kynna nýsköpun og atvinnuþróun á svæðinu, sem og þau tækifæri og áskoranir sem íbúar svæðisins standa frammi fyrir.
19:06 20. ág. 2020  

Breytingar á tímaáætlun Húnvetnings vegna Covid-19 og sóttvarna

Frá sameiningarnefndinni

Á fundi framkvæmdaráðs Húnvetnings þann 14. ágúst 2020 var ákveðið að fresta íbúafundum sem fyrirhugaðir voru í sveitarfélögunum fjórum í lok ágúst og byrjun september. Ákvörðunin er tekin með hliðsjón af fjölgun Covid-19 smita í samfélaginu á síðustu vikum og aðgerðum stjórnvalda til að takmarka útbreiðslu veirunnar.
19:10 02. júl. 2020  

Austur- Húnvetningar funda með ráðamönnum

Frá sameiningarnefndinni

Mánudaginn 15. júní áttu oddvitar og sveitarstjórar sveitarfélaganna í Austur- Húnavatnssýslu fundi með Þórdísi Kolbrúnu Reykfjörð Gylfadóttur, ferða-, iðnaðar- og nýsköpunarráðherra, Sigurði Inga Jóhannssyni, samgöngu- og sveitarstjórnarráðherra og Kristjáni Þór Júlíussyni sjávarútvegs- og landbúnaðarráðherra.
11:43 30. apr. 2020  

Samskiptasáttmáli Húnvetnings

Frá sameiningarnefndinni

Blönduósbær, Húnavatnshreppur, Skagabyggð og Sveitarfélagið Skagaströnd hafa átt í viðræðum um mögulega sameiningu sveitarfélaganna undanfarin tvö ár. Um síðustu áramót var ákveðið að setja aukinn kraft í vinnuna og ráðgjafafyrirtækið RR ráðgjöf fengið til samstarfs. Undanfarin misseri hefur verið unnið að framgangi verkefnisins með tíðari fundum sveitarstjórnarfólks, greiningu á helstu hagsmunum Húnvetninga og forgangsröðun aðgerða.
16:08 24. apr. 2020  

Ákvörðun um formlegar sameiningarviðræður í september

Tilkynning frá sameiningarnefndinni

Á fundi sameiningarnefndar sveitarfélaganna í Austur-Húnavatnssýslu þann 16. apríl var ákveðið að gera breytingar á tímalínu verkefnisins Húnvetnings vegna heimsfaraldurs Covid-19. Í upphaflegri áætlun var gert ráð fyrir að sveitarstjórnir tækju ákvörðun um hvort hefja skuli formlegar sameiningarviðræður í lok apríl eða maí.
16:05 24. apr. 2020  

Samstaða um helstu hagsmunamál Húnvetninga

Tilkynning frá sameiningarnefndinni

Eitt meginmarkmið verkefnisins Húnvetnings er að koma helstu hagsmunamálum Austur-Húnvetninga á framfæri við stjórnvöld. Sameiningarnefnd sveitarfélaganna í Austur-Húnavatnssýslu hefur á fundum sínum fjallað um helstu styrkleika, veikleika, áskoranir og tækifæri svæðisins og íbúa. Samstaða er um það meðal sveitarfélaganna að brýnustu verkefni næstu missera séu á sviði atvinnu- og samgöngumála.
09:06 30. mars 2020  

Sameiningarvinnu seinkar

Kórónuveirufaraldurinn hefur sett strik í reikninginn við undirbúningsvinnu fyrir sameiningu sveitarfélaga víða um land og þar á meðal í Austur-Húnavatnssýslu. Í Morgunblaðinu í dag er haft eftir Róberti Ragnarssyni, framkvæmdastjóra RR ráðgjafar að vinnan haldi áfram en það hægi á henni og afgreiðslur frestist. Öllum verkþáttum hefur verið frestað þar sem fólk þarf að hittast á vinnustofum. RR ráðgjöf heldur utan um vinnu í tengslum við sameiningu sveitarfélaga á fjórum stöðum á landinu.
14:50 18. mars 2020  

Látið verði reyna á sameiningarvilja núverandi sveitarfélaga í sameiningarnefnd A-Hún.

Byggðarráð Húnaþings vestra telur eðlilegt að áður en víðtækar og á margan hátt flóknar sameiningar sveitarfélaga í öllum landshlutanum komi til umræðu verði reynt á sameiningarvilja þeirra sveitarfélaga í landshlutanum sem eigi að baki áratugalangt og náið samstarf innan afmarkaðra svæða hans. Þetta kemur fram í bókun byggðarráðs í tilefni af bréfi sem sameiningarnefnd Austur-Húnavatnssýslu hefur sent sveitarfélaginu.
13:18 11. mars 2020  

Rýna þarf ýmis atriði í tengslum við sameiningu sveitarfélaganna

Á fundum ráðgjafa RR ráðgjafar með sveitarstjórnum í Austur-Húnavatnssýslu hafa komið fram ákveðnir fyrirvarar í tengslum formlegar sameiningarviðræður sveitarfélaganna. Í fundargerð sameiningarnefndar A-Hún. frá 25. febrúar síðastliðnum kemur fram að sveitarstjórn Skagastrandar hafi lagt fram ósk um að unnið yrði að því að finna samhljóm og sameiginlega megin hagsmuni á svæðinu. Þá kom fram ósk frá sveitarstjórn Húnavatnshrepps um að mörkuð yrði stefna varðandi framtíðarverkefni á Húnavöllum ef skólahald þar leggist af.
13:39 06. mars 2020  

Fleiri sveitarfélögum boðið til viðræðna um sameiningu

Sameiningarnefnd Austur-Húnavatnssýslu kom saman í fyrsta sinn á árinu þann 25. febrúar síðastliðinn. Á fundinum var meðal annars rædd aðild annarra sveitarfélaga að sameiningarviðræðunum. Samþykkt var samhljóða að bjóða Húnaþingi vestra, Sveitarfélaginu Skagafirði og Akrahreppi formlega að viðræðunum.
15:50 15. feb. 2020  

Engar þvingaðar sameiningar á næstu árum

Í drögum að frumvarpi til breytinga á sveitarstjórnarlögum, sem innleiðir á ný ákvæði um lágmarksíbúafjölda sveitarfélaga, er haldið í þá reglu sem áður var að finna í sveitarstjórnarlögum frá 1986 og 1998, um að miða skuli við að íbúafjöldi sveitarfélaga þurfi að vera undir lágmarksíbúðamarkinu þrjú ár í röð, áður en ráðuneyti sveitarstjórnarmála ber að hafa frumkvæði að sameiningu sveitarfélagsins við annað eða önnur félög. Þá verður ráðherra fengin heimild til að veita sveitarfélagi tímabundna undanþágu til allt að fjögurra ára frá skilyrði um lágmarksíbúafjölda, ef sérstakar félagslegar eða landfræðilegar aðstæður eru til staðar.
12:05 14. feb. 2020  

Frumvarp um lágmarksíbúafjölda sveitarfélaga komið í samráðsgáttina

Drög að frumvarpi til breytinga á sveitarstjórnarlögum sem innleiðir á ný ákvæði um lágmarksíbúafjölda sveitarfélaga hafa verið birt í samráðsgátt stjórnvalda til umsagnar. Samkvæmt frumvarpinu verður lágmarksíbúafjöldi 250 frá almennum sveitarstjórnarkosningum árið 2022 og 1.000 frá almennum sveitarstjórnarkosningum árið 2026. Allir hafa tækifæri til að senda inn umsögn eða ábendingar en frestur til að skila umsögn er til og með fimmtudagsins 27. febrúar 2020.
10:18 06. feb. 2020  

Sameiningaviðræður að fara af stað aftur

Jón Gíslason, formaður sameiningarnefndar sveitarfélaga í Austur-Húnavatnssýslu, sagði í samtali við Ríkisútvarpið í gær að sameiningaviðræður væru að fara af stað aftur núna. Hlé hafi verið gert á þeim síðastliðið vor og ákveðið að bíða og sjá hvað yrði úr væntanlegri lagasetningu. Sagði hann að alltaf hafi verið horft til þess að viðræðum lyki með kosningum og sameining tæki gildi við næstu sveitarstjórnarkosningar árið 2022.
10:15 18. des. 2019  

Fjárhagsáætlun Blönduósbæjar samþykkt

Sveitarstjórn Blönduósbæjar samþykkt fjárhagsáætlun sveitarfélagsins fyrir árið 2020 á fundi sínum í gær. Samkvæmt henni verða heildartekjur á næsta ári 1.288 milljónir króna og rekstrargjöld 1.244 milljónir. Fjármagnsliður eru áætlaðir 50 milljónir og því er gert ráð fyrir að rekstrarniðurstaða ársins verði jákvæð um 14 milljónir króna. „Fjárhagsáætlun Blönduósbæjar fyrir 2020 ber þess merki að góður árangur hefur náðst í rekstri sveitarfélagsins og mikilvægt að áfram verði gætt aðhalds og varfærni í öllum rekstri,“ segir í bókun sveitarstjórnar.
11:57 14. des. 2019  

Fjárhagsáætlun Húnavatnshrepps samþykkt

Fjárhagsáætlanir Húnavatnshrepps fyrir árið 2020 og árin 2021-2023 voru samþykktar á sveitarstjórnarfundi í gær. Í fundargerð kemur fram að við gerð fjárhagsáætlunar 2020 hafi verið lögð áhersla á aðhald í rekstri, líkt og undanfarin ár. Tekjur eru áætlaðar 502,3 milljónir og gjöld 481,8 milljónir. Tekjuafgangur fyrir fjármagnsliði er áætlaður 20,5 milljónir. Fjármagnsliðir eru neikvæðir um 15,9 milljónir og rekstrarniðurstaðan því áætluð með 4,5 milljóna króna tekjuafgangi. Skuldahlutfallið, þ.e. hlutfall af skatttekjum og skuldum er áætlað 69,5% en má samkvæmt ákvæðum fjármálareglna hæst vera 150%.
11:20 13. des. 2019  

Fjárhagsáætlun Skagastrandar samþykkt

Sveitarstjórn Skagastrandar samþykkti á fundi sínum í gær fjárhagsáætlun sveitarfélagsins fyrir árin 2020-2030. Áætlað er að heildartekjur á næsta ári verði 650,7 milljónir króna og að rekstrargjöld verði 652,4 milljónir króna. Fjármagnsliðir eru áætlaðir jákvæðir um 3,3 milljónir og rekstrarniðurstaðan því áætluð jákvæð um 1,7 milljónir. Í áætlun áranna áranna 2021-2023 er gert ráð fyrir jákvæðri rekstrarniðurstöðu öll árin.
09:41 07. sep. 2019  

Mæla með samþykkt þingsályktunartillögu

Á aukalandsþingi Sambands íslenskra sveitarfélag sem haldið var í Reykjavík í gær var samþykkt að mæla með því við Alþingi að fyrirliggjandi þingsályktunartillaga um stefnumótandi áætlun í málefnum sveitarfélaga fyrir árin 2019-2033 og aðgerðaráætlun fyrir árin 2019-2023 verði samþykkt. Aðeins eitt málefni var á dagskrá þingsins að þessu sinni, umrædd þingsályktunartillaga, en í henni er gert ráð fyrir því að sveitarfélögum muni fækka verulega fyrir árið 2022 og enn frekar fyrir árið 2028.
10:10 06. sep. 2019  

705 milljónir í sameiningarstyrk

Samkvæmt drögum að nýjum reglum um styrki Jöfnunarsjóðs sveitarfélaga til að greiða fyrir sameiningu fengju sveitarfélögin í Austur-Húnavatnssýslu 705 milljónir króna í sameiningarstyrk ef þau ákveða að sameinast. Sameiningaviðræður hafa staðið yfir undanfarin misseri hjá Blönduósbæ, Húnavatnshreppi, Skagabyggð og Sveitarfélaginu Skagaströnd um mögulega sameiningu. Sameiningarnefnd hefur verið að störfum og hefur hún m.a. kallað eftir með hvaða hætti ríkisvaldið ætli að koma að verkefninu.
   

Sameining Austur-Húnavatnssýslu

https://www.huni.is/sameining/

sameining@huni.is